Məxfilik Siyasəti

1. Məlumatlara kim cavabdehdir

Fərdi məlumatların mülkiyyətçisi və operatoru MİİİM Global platformasının operatoru olan “MİİİM GLOBAL” Məhdud Məsuliyyətli Cəmiyyətidir (VÖEN 1103125111; hüquqi ünvan: AZ1083, Bakı şəhəri, Qaradağ rayonu, Sahil qəsəbəsi, Əliyar Gülbabayev, ev 85). Məxfiliklə bağlı bütün sorğular üçün əlaqə ünvanı: info@miiimglobal.com.

2. Hansı məlumatları toplayırıq

• Hesab məlumatları: ad, e-poçt ünvanı, şifrə (yalnız geri qaytarıla bilməyən şifrələnmiş formada), qeydiyyatda bildirdiyiniz telefon və şəhər, interfeys dili, saat qurşağı və iki mərhələli giriş ayarları.
• Şirkət və profil məlumatları: şirkətin adı, ünvanı, fəaliyyət sahələri, kataloq, sertifikatlar və profilə əlavə etdiyiniz əlaqə şəxsləri (ad, vəzifə, e-poçt, telefon, WhatsApp, LinkedIn). Profili dərc etdikdə bu məlumatlar hər kəsə görünür.
• Yüklədiyiniz fayllar: şəkillər, PDF sənədlər və 3D modellər. Hər fayl yüklənərkən virus yoxlamasından keçir. Açıq göstərilən şəkillərdən gizli metaməlumatlar (məsələn, çəkiliş yeri) silinir.
• Yazışmalar: mesajlar, qiymət təklifləri, görüş təklifləri, əlavə fayllar və tender müraciətləri. Bunları yalnız yazışmanın tərəfləri, mübahisə və ya şikayət araşdırılan hallarda isə platformanın adminləri görür.
• Platformadakı fəaliyyətiniz: saxladığınız məhsul və profillər, izlədiyiniz profillər, saxlanmış axtarışlar, bildiriş seçimləri və brauzer bildirişlərinə (push) abunəliyiniz.
• Statistika: profil baxışları və axtarışda görünmə sayları. Bu sayğaclarda ziyarətçinin IP ünvanı, brauzeri və ya cookie-si saxlanmır. Brauzeriniz “Do Not Track” və ya “Global Privacy Control” siqnalı göndərirsə, sayğac qeyd aparmır. Ziyarətçinin ölkəsi və şəhəri IP ünvanına görə serverdəki oflayn bazadan (DB-IP) müəyyən edilir; IP ünvanı nə saxlanır, nə də başqa xidmətə göndərilir.
• Profilə baxan şirkət: daxil olmuş üzv başqa şirkətin profilinə baxdıqda və ya onu axtarış nəticəsində gördükdə, baxan şirkət və istifadəçi 180 gün saxlanılır. Profil sahibi, paketində bu funksiya varsa, yalnız şirkətin adını görür. Bu qeydə “Hesab → Təhlükəsizlik” bölməsində etiraz edə bilərsiniz; etiraz etdikdə əvvəlki qeydləriniz də silinir.
• Təhlükəsizlik jurnalı: hesabda və platformada edilən vacib hərəkətlər (giriş, ayarların və məzmunun dəyişdirilməsi, admin qərarları) qeyd olunur. Bu qeydlərdə IP ünvanı və brauzer, əməliyyat sistemi və cihaz növü 30 gün saxlanılır.
• Ödənişlər: sifariş, məbləğ, ödənişin vəziyyəti və qəbz. Kart məlumatlarını ödəniş təminatçısının (Epoint) səhifəsində daxil edirsiniz; kart nömrəsini biz görmür və saxlamırıq.
• Əlaqə forması və xəbər bülleteni: ad, e-poçt və mesajınız. Bülletenə abunəlik e-poçtla təsdiqlənir və istənilən vaxt ləğv edilə bilər.

3. Məlumatları nə üçün və hansı əsasla istifadə edirik

• Hesabın yaradılması, profillərin, kataloqun, axtarışın, mesajlaşmanın, tenderlərin və paketlərin işləməsi — istifadəçi ilə bağlanmış müqavilənin icrası.
• Təhlükəsizlik, fırıldaqçılığın və sui-istifadənin qarşısının alınması, audit — qanuni maraq və qanunla müəyyən edilmiş öhdəliklər.
• Uyğun imkanların, tövsiyələrin və bildirişlərin hazırlanması — müqavilənin icrası; bildirişlərin tezliyini və növünü özünüz seçirsiniz.
• Profilə baxan şirkətin göstərilməsi — qanuni maraq (B2B əlaqələrin qurulması); etiraz hüququnuz var.
• Xəbər bülleteni və brauzer bildirişləri — razılığınız; razılığı istənilən vaxt geri götürə bilərsiniz.
• Ödənişlər və mühasibat uçotu — müqavilənin icrası və qanunla müəyyən edilmiş öhdəliklər.

Yalnız göstərilən məqsədlər üçün zəruri olan məlumatları istəyirik. Qeydiyyat üçün ad, e-poçt və şifrə məcburidir; onları təqdim etmədən hesab yaratmaq mümkün deyil. Digər məlumatları (telefon, şəhər, profil və əlaqə şəxsləri) təqdim etmək könüllüdür; təqdim edilmədikdə müvafiq funksiyalar məhdud işləyir.

Məlumatlarınızı satmırıq və reklam məqsədilə üçüncü şəxslərə vermirik. Platformada reklam və izləmə (tracking) cookie-ləri yoxdur.

4. Məlumatlar kimlərə ötürülür

Platformanın işləməsi üçün aşağıdakı xidmət təminatçılarından istifadə edirik. Onlar məlumatları yalnız bizim tapşırığımızla və bu xidmət üçün emal edir.

• Hostinger — server (Almaniya, Avropa İttifaqı) və korporativ e-poçt.
• Cloudflare — domen adları (DNS) və ehtiyat nüsxələrin saxlanması. Ehtiyat nüsxələr serverdə şifrələnir və Avropa İttifaqı daxilində saxlanılır.
• OpenRouter və onun vasitəsilə seçilən süni intellekt modeli təminatçıları — yalnız müvafiq AI funksiyası aktiv olduqda. Sorğular yalnız məlumatı saxlamayan (zero data retention) təminatçılara göndərilir və məlumatların modelin öyrədilməsi üçün istifadəsi qadağandır. Göndərilənlər: dərc olunmuş profil məlumatları, açıq tender mətnləri, axtarış sorğusu və şəkil ilə axtarış üçün yüklədiyiniz şəkil (şəkil saxlanmır). Ətraflı: “Süni intellekt necə istifadə olunur” səhifəsi.
• Epoint — ödənişlərin qəbulu.
• Brauzer bildirişi xidmətləri (Google, Mozilla, Microsoft, Apple) — yalnız push bildirişlərinə abunə olmusunuzsa; bildirişin məzmunu şifrəli göndərilir.
• Dövlət orqanları — yalnız qanunla tələb olunduqda.

5. Məlumatların xaricə ötürülməsi

Server və ehtiyat nüsxələr Azərbaycan Respublikasının hüdudlarından kənarda, Avropa İttifaqında (Almaniya) yerləşir; Avropa İttifaqının qanunvericiliyi fərdi məlumatların yüksək səviyyədə mühafizəsini təmin edir. Süni intellekt təminatçıları başqa ölkələrdə (o cümlədən Amerika Birləşmiş Ştatlarında) yerləşə bilər; onlara yalnız açıq məlumat və axtarış sorğuları, məlumatı saxlamamaq və öyrətmə üçün istifadə etməmək şərti ilə göndərilir. “Fərdi məlumatlar haqqında” Qanunun 14-cü maddəsinə uyğun olaraq, məlumatların bu ölkələrə ötürülməsinə qeydiyyat zamanı ayrıca razılıq verirsiniz. Ötürülən məlumatların təhlükəsizliyini müqavilə və texniki tədbirlərlə təmin edirik.

6. Məlumatlar nə qədər saxlanılır

• Hesab: hesab aktiv olduqca. Hesab bağlandıqdan 30 gün sonra şəxsi məlumatlar silinir və ya anonimləşdirilir.
• Təhlükəsizlik jurnalında IP ünvanı və cihaz məlumatı: 30 gün.
• Profilə baxan şirkət qeydləri: 180 gün.
• Giriş sessiyası: 7 gün; e-poçt təsdiqi linki: 24 saat; şifrə bərpası linki: 30 dəqiqə.
• Ehtiyat nüsxələr: 30 günə qədər. Silinmiş məlumat bu müddət ərzində şifrəli ehtiyat nüsxələrdə qala bilər və yalnız bərpa üçün istifadə olunur.
• Ödəniş qeydləri: qanunvericiliyin tələb etdiyi müddət ərzində.
• Mesajlar, profillər və digər məzmun: hesab aktiv olduqca və ya siz silənə qədər.

Emal məqsədinə nail olunduqda və saxlanılmasına ehtiyac qalmadıqda məlumatlar dərhal məhv edilir və ya anonimləşdirilir.

7. Hüquqlarınız

“Fərdi məlumatlar haqqında” Qanunun 7-ci maddəsinə uyğun olaraq aşağıdakı hüquqlara maliksiniz:

• Məlumat almaq: hansı məlumatlarınızın, hansı hüquqi əsasla, hansı məqsədlə və nə qədər müddətə emal edildiyini, məlumatların mənbəyini və kimlərin onlara çıxışı olduğunu öyrənmək.
• Məlumatlarınızı əldə etmək: “Hesab → Təhlükəsizlik” bölməsində bütün şəxsi məlumatlarınızı fayl kimi yükləyə bilərsiniz.
• Düzəliş etmək: hesab və profil məlumatlarınızı özünüz redaktə edirsiniz; digər hallar üçün info@miiimglobal.com ünvanına yazın.
• Silinmə: “Hesab → Təhlükəsizlik” bölməsindən hesabın silinməsi sorğusu göndərin. Sorğu təsdiqləndikdə hesab dərhal bağlanır, şəxsi məlumatlar 30 gün sonra silinir. Bağlanmış hesab bərpa edilmir.
• Etiraz etmək və emalın dayandırılmasını tələb etmək: qanunla məcburi olan hallar istisna olmaqla, məlumatlarınızın toplanmasına və emalına etiraz edə bilərsiniz; o cümlədən profilə baxan şirkət kimi göstərilməyə “Hesab → Təhlükəsizlik” bölməsində dərhal etiraz etmək mümkündür.
• Avtomatlaşdırılmış qərarlara etiraz etmək: platformada sizin barənizdə hüquqi nəticə doğuran qərarlar yalnız avtomatik qəbul edilmir; süni intellektin və qaydaların nəticələri tövsiyədir.
• Razılığı geri götürmək: bülletendən, brauzer bildirişlərindən və bildiriş növlərindən istənilən vaxt imtina edə bilərsiniz.
• Şikayət etmək: hüquqlarınızın pozulduğunu düşünürsünüzsə, Azərbaycan Respublikasının Rəqəmsal İnkişaf və Nəqliyyat Nazirliyinə və ya məhkəməyə müraciət edə, vurulmuş zərərin ödənilməsini tələb edə bilərsiniz.

Sorğunu platformadakı hesabınızdan, info@miiimglobal.com ünvanına və ya yazılı şəkildə göndərə bilərsiniz; şəxsiyyətinizi təsdiqləmək üçün əlavə məlumat istəyə bilərik. Sorğulara ödənişsiz, 7 iş günü ərzində cavab veririk; üçüncü şəxslə razılaşdırma tələb olunarsa, bu müddət ən çox 7 iş günü uzadıla bilər. Sorğunun icrasından imtina edildikdə əsaslandırılmış cavab 5 iş günü ərzində verilir.

8. Təhlükəsizlik

Fərdi məlumatların qanunsuz və ya təsadüfi əldə edilməsindən, dəyişdirilməsindən, yayılmasından və məhv edilməsindən qorunması üçün təşkilati və texniki tədbirlər görürük. Bütün bağlantılar HTTPS ilə şifrələnir. Şifrələr geri qaytarıla bilməyən şəkildə saxlanılır, iki mərhələli giriş mövcuddur, yüklənən fayllar virus yoxlamasından keçir, ehtiyat nüsxələr şifrələnir, admin hərəkətləri jurnalda qeyd olunur. Heç bir sistem tam risksiz deyil; təhlükəsizlik problemi aşkar etsəniz, info@miiimglobal.com ünvanına yazın.

9. Yaş həddi

Platforma 18 yaşdan kiçik şəxslər üçün nəzərdə tutulmayıb.

10. Cookie-lər

Platformada yalnız işləməsi üçün zəruri olan cookie-lər istifadə olunur. Siyahı və müddətlər “Cookie siyasəti” səhifəsindədir.

11. Dəyişikliklər

Siyasət dəyişdikdə yeni versiya bu səhifədə dərc olunur və tarixi yenilənir. Emal məqsədləri, məlumatların siyahısı və ya ötürüldüyü şəxslər dəyişdikdə yeni razılığınızı alırıq.

Bu siyasət Azərbaycan, ingilis, türk və rus dillərində dərc olunur; mətnlər arasında fərq olduqda Azərbaycan dilindəki mətn əsas götürülür.

12. Əlaqə

info@miiimglobal.com